Félagsgsráðgjafar eru með viðtalstíma á miðvikudögum klukkan 12:00 – 15:30 á skrifstofu Hjálparstarfs kirkjunnar, Háaleitisbraut 66, neðri hæð Grensáskirkju. Einstaklingsmiðuð nálgun og notendastýrð þjónustu eru lykilverkfæri félagsráðgjafanna sem leggja höfuðáherslu á að hlusta á og ræða við einstaklingana sem til þeirra leita og vinna með þeim á forsendum þeirra sjálfra. Félagsráðgjafarnir benda jafnframt á úrræði í samfélaginu sem kunna að gagnast fólki við að komast út úr erfiðum aðstæðum.

Efnislegur stuðningur er nauðsynlegur til þess að svara brýnni þörf fólks í félagslegri neyð en til þess að fólk komist út úr vítahring fátæktar og félagslegrar einangrunar þarf að takast á við aðstæður á heildrænan hátt. Með það að markmiði að stuðla að aukinni virkni fólks í félagslegri neyð skipuleggja félagsráðgjafar Hjálparstarfs kirkjunnar reglulega sjálfstyrkingarnámskeið og hópastarf í samráði við þá sem aðstoðar leita hjá stofnuninni.

Töskur með tilgang er samvinnuverkefni Hjálparstarfs kirkjunnar og Hjálpræðishersins fyrir konur úr hópi innflytjenda, flóttafólks og hælisleitenda sem eru utan vinnumarkaðar. Konurnar sem höfðu lýst þörf fyrir virkni af einhverju tagi, sníða og sauma fjölnota innkaupatöskur og -poka og fleira úr efni sem almenningur hefur gefið og nota til þess saumavélar sem almenningur hefur gefið sömuleiðis. Hjálparstarf kirkjunnar selur afurðirnar og andvirðið rennur aftur til verkefnisins. Konurnar stuðla þannig að umhverfisvernd um leið og þær fá tækifæri til að vera virkar og njóta félagsskapar.

Stattu með sjálfri þér – virkni til farsældar hófst í febrúar 2018. Markmið verkefnisins til tveggja ára eru að þátttakendur, konur sem búa við örorku og eru með börn á framfæri, fái bætt sjálfsmynd sína og aukna trú á eigin getu; að þær styrki tengslanet sitt til að koma í veg fyrir félagslega einangrun og eflist í foreldrahlutverkinu.

Hjálparstarfið og Hjálpræðisherinn skipuleggja á hverju sumri Samveru og góðar minningar, sumarfrí fyrir fjölskyldur á Úlfljótsvatni. Boðið er upp á fjölbreytta dagskrá í fjóra daga með það að markmiði að fjölskyldur sem búa við kröpp kjör geti átt gleðilegt frí saman og safnað góðum minningum.

Ræktaðu garðinn þinn er hópastarf sem stendur yfir sumartímann þar sem þátttakendur fá pláss í matjurtagörðum sveitarfélaga og fá þar tækifæri til að rækta sitt eigið grænmeti.

Styrkja