Reikningsnúmer:
Verkefni erlendis:
0334-26-50886
Verkefni innanlands:
0334-26-27
kt. 450670-0499
Söfnunarsímar
907 2002
hjálp heima, 2500 kr.
907 2003
hjálp erlendis, 2500 kr.
viltukaupagjafabref
Fyrir vefsíðuna
Viltu senda
minningarkort?
Komum heiminum í lag 17.09.2012

Frjáls félagasamtök á Íslandi, sem starfa að alþjóðlegri þróunarsamvinnu, standa að kynningu á þróunarmálum í samstarfi við Þróunarsamvinnustofnun Íslands vikuna 17.-22. september. Þetta er í annað sinn sem þessi hópur stendur að slíku átaki en áherslan í ár er á ójöfnuð í heiminum.

Markmiðið með átakinu, sem ber yfirskriftina „Þróunarsamvinna ber ávöxt“ er að auka skilning og þekkingu almennings á málefnum þróunarlanda og vekja Íslendinga betur til vitundar um samfélagslegar og siðferðilegar skyldur þjóðarinnar í baráttunni gegn fátækt, vannæringu og ójöfnuði í heiminum.

Ójöfnuður hverskonar; menningarlegur, félagslegur, pólitískur, landfræðilegur og fjárhagslegur, leiðir af sér langvarandi fátækt. Nýlegar rannsóknir sýna að mikill ójöfnuður tekna hægir á vexti. Milljónir manna eru fórnarlömb þessara aðstæðna og verða af félags- og efnahagslegum tækifærum.

Barn, sem fæðist inn í fjölskyldu sem er í hópi þeirra tuttugu prósenta íbúa sem hafa lægstar tekjurnar (samanborið við barn sem fæðist inn í fjölskyldu sem tilheyrir hópi þeirra tuttugu prósenta sem hafa hæstar tekjurnar) er:

·         þrisvar sinnum líklegra til að vera undir kjörþyngd miðað við aldur.

·         tvisvar sinnum líklegra til að vera vanþroska af völdum vannæringar.

·         tvisvar sinnum líklegra til að deyja fyrir fimm ára aldurinn, oftast úr sjúkdómum sem auðveldlega hefði mátt koma í veg fyrir.

Þau 20% íbúa heimsins sem hafa hæstar tekjurnar stýra 64-80% af öllum tekjum heimsins á meðan 20% fátækustu íbúanna hljóta eingöngu 1-3% allra tekna í sinn hlut. Hlutur þeirra fátækustu hefur ótrúlega lítið batnað síðustu tvo áratugi. Ef fram heldur sem horfir, mun það taka þær þúsund milljónir hinna tekjulægstu 800 ár að ná því að afla 10% teknanna.

Undirtitill átaksins í ár er „Komum heiminum í lag“ en félagasamtökin hafa fengið landsþekkta tónlistarmenn til að leggja málefninu lið og koma skilaboðum átaksins í „lag“. Tónlistarmennirnir semja 5 mismunandi lög við sama textann og verður eitt lag frumflutt á degi hverjum frá mánudegi til föstudags vikuna 17.–21. september í Virkum morgnum á Rás 2 og á netinu. Átakinu lýkur svo með tónleikum á Café Rosenberg við Klapparstíg laugardagskvöldið 22. september. Þeir sem semja lögin 5 og koma fram á tónleikunum eru Jón Jónsson og Friðrik Dór, Lára Rúnarsdóttir og hljómsveit, Magni Ásgeirsson, Ragnheiður Gröndal og Védís Hervör og Varsjárbandalagið. Hægt er að kynna sér lögin á Facebook-síðu átaksins. Þá getur tónlistarfólk um allt land einnig nálgast texta Sævars þar, spreytt sig á lagasmíðum og sent inn.

Þá standa Afríka 20:20 - félag áhugafólks um Afríku sunnan Sahara og Bíó Paradís fyrir sýningum á þremur kvikmyndum frá Afríku eða tengdar álfunni; 14 KilometresBamako og Viva Riva! Hver mynd verður aðeins sýnd þrisvar sinnum helgina 21. – 23. september og því um að gera að grípa þetta einstaka tækifæri til að kynnast afrískri kvikmyndamenningu. Allar nánari upplýsingar er að finna á bioparadis.is.

Föstudaginn 21. september kl. 15.00-17.00 stendur Félag Sameinuðu þjóðanna fyrir málþingi í Öskju í Háskóla Íslands um háskóla S.þ. á Íslandi en þeir eru Jarðhitaskólinn, Sjávarútvegsskólinn, Landgræðsluskólinn og Jafnréttisskólinn. Á málþinginu munu m.a. nemendur í skólunum segja frá reynslu sinni auk þess sem Ólafur Páll Jónsson, dósent við menntavísindasvið Háskóla Íslands, mun ræða um menntun til sjálfbærni. Fundarstjóri er Þröstur Freyr Gylfason, formaður Félags S.þ. og fer málþingið fram á ensku.

Í Fréttablaðinu munu einnig birtast greinar þar sem fólk úr ýmsum geirum samfélagsins veltir vöngum yfir þróunarsamvinnu.

Að átakinu standa ABC barnahjálp, Afríka 20:20, Barnaheill – Save the Children á Íslandi, Barnahjálp Sameinuðu þjóðanna – UNICEF á Íslandi, Félag Sameinuðu þjóðanna á Íslandi, Hjálparstarf kirkjunnar, Rauði krossinn, Samband íslenskra kristniboðsfélaga, SOS barnaþorpin á Íslandi, UN Women og Þróunarsamvinnustofnun Íslands.

Til baka